PARTORDING NI ACARA PARNINGOTAN
DI
HAMAMATE NI TUHAN JESUS
HURIA KRISTEN
BATAK PROTESTAN
DISTRIK XVII INDONESIA
BAGIAN TIMUR
Topik : Rap dohot Kristus di Paradeiso
Jumat, 18
April 2014
01. Joujou tu Pesta Parningotan di hamamate ni
Tuhan Jesus
U : Hamu angka dongan na tinobus ni Kristus, andorang so tapungka parsaoranta
di ari na badia on, jalo hamu ma tabe holong sian hami na mangkobasi parpunguan
on: Syaloom !
Hamu angka dongan masuk ma hita tu parsaoran ni huria na badia, parsaoran
na marningot Ari Hamamate ni Tuhan Jesus na mamorsan dosanta di dolok Golgata.
Asa tung gomal di rohanta balga ni holongNa na marpanghophopon i tapaias
rohanta, tapahibul pingkiranta, tapaserep jala tapaunduk dirinta di toru ni silang
ni Tuhanta i. Marende ma hita.
02. Marende BE No. 81 : 1 – 3 “Aha
ma endehononku”
♫ Jesus, mual ni ngolungku,
Sipangolu tondingki,
ai dibunu Ho musungku, ima hamatean i.
Ho manaoni hamagoan, patupahon hangoluan.
Ala ni hupuji Ho tung marribu hali do.
♫ Haleaon,
insahinsak, reherehe, tijur pe;
tali dohot pastappastap, tung ditaonhon Ho sude,
paluahon au na pogos sian tangan ni sibolis.
Ala
ni hupuji Ho tung marribu hali do.
(jongjong)
♫ Bugang sada tanggurungMu di na hona linsing
i;
hamamalum ni bugangku na di rohangki do i.
Ho do gabe binuraan, au dapotan hangoluan.
Ala ni hupuji Ho tung marribu hali do.
03.Votum – Introitus – Tangiang
U : Dibagasan Goar ni Debata Ama, dohot goar ni AnakNa Tuhan Jesus Kristus
dohot goar ni Tondi Parbadia na manompa langit dohot tano on.
H : Amen.
U : Tapungka parpunguan on laho marningot Hamamate
ni Jesus na gok holongi di dolok
Golgata. Sintua ni malim sisongon i do tama di hita, na badia, na so jahat, na
so marlindang, na so marbolat sian angka pardosa, naung gabe tumimbo sian angka banua
ginjang. Na so pola ganup ari songon
angka sintua ni malim mamboan jumolo pelean taringot tu angka dosana sandiri,
dungi i taringot tu dosa ni natorop i, ai sahali do i diulahon, di na mamelehon
diriNa Ibana. Tabereng ma induk ni haporseaon i jala na paujungkonsa, i ma
Jesus na manaonhon parsilangon i.
H : Singkat ni las ni roha,
tohapna i hian, so dietong i hailaon, gabe hundul di siamun ni habangsa ni
Debata.
U : Paingotingot hamu ma Ibana,
na pataontaon paraloan sisongon i dompak Ibana sian si pardosa, asa unang
marnaloja hamu, unang mandate tondimuna. On do birubiru ni Debata na mamorsan
dosa ni portibi on, Haleluya.
H : (mangendehon): Haleluya…….Haleluya……..Haleluya…….
U : Martangiang ma hita.
Ale Amanami jala Debatanami,
Parasiroha na sumurung do Ho di sude jolma manisia. Nunga dilehon Ho Anakmu
Tuhan Jesus Kristus Tuhannami manaon haleaon dohot siak ni bagi, pola mate
tarsilang, asa malua hami sian gomgoman ni sibolis. Sai parrohai ma hami
mamingkiri panaonon ni Anakmu, asa taruli hami marhite sian i di hasesaan ni
dosa dohot di haluaon sian hamatean paduahalihon. Asa dapot hami hangoluan
saleleng-lelengna marhite Tuhan Jesus Kristus Tuhannami, Anak haholongan ni
roham. Amen.
(hundul)
04. Marende
BE No. 76 : 1 – 2 “Sada na ma sangkap “
♫ Sada nama sangkap ni rohangku, di sandok portibi on;
Ndang tagamon na so las rohangku, molo jumpang au inon.
Naeng ma sai ingoton ni rohangku, na binaen ni Jesus tu tondingku,
uju pinorsanNa i, saluhutna dosangki.
♫ Ingkon sai Ibana ingotonku, uju na tarpajal
i,
tu hau pinarsilang ginantungkon, sai mabaor
mudarNa i.
Ai humophop au ditaon uasNa,
asa dohot au muse upaNa;
Ai ditatap do au on,/ di
pandokNa: “Nunga sun!”
05. Patik: I Korint 1 : 18
U : Patik ni Debata dienet sian I Korint 1 : 18 songon on ma didok: “Ai haotoon
do hata na taringot tu silang i di roha ni angka na laho mago; alai hagogoon ni
Debata do i di hita na dapotan haluaon”.
Antong rap mangido gogo
ma hita sian Tuhan Debata.
U+H: Ale Tuhan Debata, sai pargogoi ma hami
mengulahon na hombar tu patikMi. Amen.
06. Marende Huria BE. No. 681 : 1 – 2 “Ale
amang asi rohaM“
♫ Ale Amang asi rohaM di au
pardosa on,
unduk
do rohangkon nuaeng marsomba di joloM.
Unang
jujur unang jujur angka dosangki.
Sai
salpuhon sai salpuhon sian rohaMi. (jongjong)
♫ Amang sai pargogoi ma au
dihasiangan on,
TondiM pasaor tu tondingkon
pamalum rohangkon.
Sai usehon, sai usehon TondiMi
tu au,
asa
monang maralohon parungkilon au.
07.Tangiang Hasesaan Ni Dosa
U : Laho manolsoli dosanta taingot
ma Jesus na tarsilang i. Marsipal jala gok haporsuhon Ibana manaon sude
dosanta. Dileai, ditijuri, dipastapi jala dipartumpalhon sungsang duri tu
simanjujungaNa. Laos Ibana muse mamorsan hau pinarsilang i sian bagas paruhuman i sahat tu
Golgata. Lam leleng lam dokdok do silang i dituhuk Tuhan i, pola martinggangan
Ibana mamorsan. Hansit do i jala porsuk. Alai
umporsuk sian i dope diporsan dosanta. Ale Tuhan, ndang tartuhuk hami silangMi,
ndang tarrampas hami linsinglinsing ni soldadu i, gale do hami Tuhan, holan
ilunami nama na maraburan.
H : (mangendehon) BE No. 738 a : 2 “Lam jonok rohangki“
♫ Lam jonok rohangki tu Tuhanki, paingot rohangki di silangMi.
Alani holongMi di au pardosa i,
durus do MudarMi, sae utangki.
U : Ale
Tuhan Debata, Amanami na di banua ginjang! Ho do na patupahon hasesaan ni dosa
di hami halak na dangol on marhitehite Anak haholongan ni rohaM. Sai asi ma rohaM di hami, angka na mangarsakhon dosanami. Sai sahapi ma tu
bagasan rohanami hasesaan ni dosanami i. Lehon ma tu hami TondiM na badia i,
asa unang ganggu rohanami di asi ni rohaM, alai asa hot rohanami marhaporseaon
laho manggotaphon nasa dosa dohot roha portibi on, asa hupasahat hami dirinami
tu Ho, gabe pelean na mangolu jala na badia marhitehite Tuhan Jesus Kristus
Tuhannami. Amen.
H : (mangendehon) BE No. 738a : 3 “Lam
jonok rohangki“
♫ Lam jonok rohangki tu Tuhanki,
pabulus langkangki tu
lambungMi,
patau au Tuhanki mamuji GoarMi,
raphon suruanMi, disurgo i.
U : Tajalo ma Hata ni Debata
taringot tu hasesaan ni dosanta: Songon
on do Hata ni Tuhan Jesus: Ro ma hamu tu Ahu, hamu angka na loja jala na sorat,
hupasonang pe hamu. Buat hamu ma augangKu tu hamu, guruhon hamu ma sian Ahu, ai
na lambok do Ahu jala na serep marroha, asa dapotan hasonangan tondimuna. Ai
lambok do augangKu jala neang do dohot na hupaporsahon. Hasangapon ma di Debata na
di ginjang. (hundul)
08. Marende BES No. 623 : 1 + 3 “ Tarsilang Ho “
♫ Tarsilang Ho, manobus au, tung longang
rohangki,
mudarMu nabadia i, manesa dosangki.
♫ Hulehon ma Tuhan tu Ho, saluhut diringkon,
Lao mangoloi Ho Tuhanki, saleleng
ngolungki.
09. Epistel
: Psalm 22 : 2 – 12 (marsorinsorin)
U : Hata ni Debata na gabe Epistel, songon
patujolo ni jamita di parningotan hamamate ni Jesus dienet sian Psalm 22:2–12
tajaha ma marsorinsorin: Ale Debatangku, Debatangku! Boasa tung tadingkononMu,
ahu? Sai mandaodao do angka hata ni anggukkon sian hatuaonku.
H : Ale
Debatangku, sai joujou do ahu arian, alai ‘ndang mangalusi Ho, jala borngin pe
‘ndang jumpang ahu hasonangan.
U : Alai
na badia do anggo Ho, marhabangsahon angka puji-pujian ni Israel .
H : Marhaposan
tu Ho do angka ompunami, pos do rohanasida, jadi dipalua Ho do nasida.
U : Tu Ho
do nasida mangangguhi, jadi malua ma nasida, marhaposan tu Ho do nasida, jadi
‘ndang tarurak.
H : Alai gea nama ianggo ahu, ndada jolma, haeleson ni halak
jala parbilean ni natorop.
U : Sude
angka na marnida ahu marengkelengkelihon ahu, dipangangang do babana huhut
mangupirupir.
H : Tu
Jahowa ma nian dipasahat, asa dipalua ibana, dipangolu ma nian ibana, ai lomo
do rohana mida ibana.
U : Ho do
tongon na manait ahu sian ampuan, sipapos rohangku, mangonsop bagot ni dainang.
H : Dung
tubu ahu, sai Ho do parsigantunganku, sian butuha ni dainang dope sai Ho do
Debantangku.
U+H: Unang mandaodao Ho sian ahu, ai donok
nama parmaraan, ai soadong sipartumpak.
U : Ima
sahatna. Martua do na tumangihon hata ni Debata, jala naumpeopsa.
10. Marende
Huria BE No. 622 : 1 – 2 “ Mansai nalnal
diangka partingkian “
♫ Mansai nalnal di angka partingkian,
sinondang ni silangMu Tuhanki,
sian
hatiuronna marsinondang holongNa na so halampoan i
sudena bangso do marpanghirimon
tu sondang ni asi ni roha i,
songon parlugana manghalungunhon parbinsar ni mata ni ari i.
♫ SilangMu Kristus tanda ni holongMu, pahisar tondi na magopu i
mangalononghon sasude dosangku, mabaor tu laut asi ni
rohaMi.
Naung tubu hami gabe na imbaru, na ni urasan sian dosa i,
ala mudarMu na ni usehonMu di Golgota di hamamateMi.
11. Sipahusorhusoron : “
Soara Sian Silang Di Golgata “
U : Tama do sai rata parningotanta di ari hamamate ni Jesus i, ai boi tardok
hamamate ni Jesus i do sada sian pusuk jambu ni barita haluaon i. Ala ni
marhite parningotanta di hamamate ni Jesus, naeng ujionta pajongjongkon silang
ni Jesus i di rohanta be, anggiat lam taantusi balga ni holong ni Tuhan i di
hita. Tarsilang Ibana nang pe so adong diula na so ture. Nunga marujung paruhuman tu Jesus, nunga sombu tagas ni
soldadu i manambohi Jesus di via dolorosa. Silang i pe nunga sahat tu Golgata.
Di na jongjong silang i jala
dilabangkon simangido dohot simanjojak ni Tuhan i, ihut do dua halak
parjahat diparsilangkon di inganan i. Gabe tolu ma silang na pantik di Golgata
uju i. Ndang dipaboa ise goar ni parjahat na dua i. Ndada na so diboto panurat Evangelium on goar ni parjahat na dua
i umbahen na so di surathon. Ra, ndang goarna i na ringkot baritahonon ni
panurat Evagelium, angka hata na haruar sian silangna i do dohot Hata na haruar
sian silang ni Tuhan i. Alai nang pe songon i adong do sian penafsir na mandok
ia goar ni parjahat na muba i rohana i ma si Dismas, jala parjahat na mangaleai
Jesus i, i ma si Dumachus. Ringkot do
parrohahononta angka hata na haruar sian Jesus sian silang i.
H : (mangendehon) BE No. 412 : 1 “Ndi di
dolok adui“
♫ Ndi, di dolok adui silang ni Tuhan i, sap mudar, sap tijur do i.
Jesus mate disi, asa malum dibaen sude angka gondok roha i.
Dibaen i, tung holong rohangki mida silang di Golgata i.
Hupasolhot diringku
tusi, dompak surgo pardalananki.
a. Soara sian silang di Golgata : Unang taleai Debata
U : Mangihuthon legenda si Dumachus do goar ni parjahat on. Alai mamereng tu pangalahona rungka do roha mambahen goarna si Jogal. Ninna, na jahat do ibana jala sibunu jolma. Ala ni do umbahen
dipajal ibana. Hape nang di silangna
ilam jogal do rohana. Ai tarihutihut mago do ibana tu natorop mangaleai Jesus na tarsilang i. Tarida do
pangaleaionna di Jesus sian hatana: Ai nda Kristus Ho? Sasintongna ndada hatana
i, na dipabegebege do pandohan i sian reherehe, panginsahion dohot sian
pangaleaion ni angka natorop. Ndada na manungkun sangkapna, tung na papuashon
pangaleaionna do. Nunga naeng marujung ngoluna sai dipajogal dope rohana. Nunga
di rungkungna hosana sai dileai dope Tuhan i, didok :
H : Ai nda Kristus i Ho? Palua ma dirim nang
hami antong.
U : Begeon songon poda na uli pandohanna i. Hape
ndang sian rohana i, hata sipalensem do i. Kemunafikan do i. Sai adong do jolma
na songon i nang di tingki on, sai dileai Tuhan i, marhite hatana dohot
parulaonna. Adong do sian na mandok dirina Kristen hape hatana, tanganna,
pambahenanna paleahon Kristus i. Tung tangkas do ngolu sipalensemna i, ai tar
songon na manghasiati Kristus do hatana, hape na mangalai tu ngadol do
sangkapna. Soara sian silang ni parjahat i gok pangaleaion, gok sipaulaula,
jala holan manarihon diri. Aut boha dope adong no songon i sian halak Kristen
di tingki on, goarna Kristen, ro tu gereja, hape sai dileai dope Kristus i
marhite angka ulaonna: manggadis togel, narkoba, mamunu, merampok dohot ulaon
na asing. Nunga pantik silang di angka bagas gareja, alai sai masa dope angka
pangaleaion tu Jesus. Nunga mate Jesus humophop jolma, ala ni tapaso ma na
mangaleai Kristus.
H : (mangendehon) BE No. 412 : 1 “Ndi di
dolok adui“
♫ Dileai jolma i silang ni
Tuhan i, hape, haluaon do i.
nang godang dosangki, alai sesa do i,
Dibaen i, tung holong rohangki mida silang di Golgata i.
Dibaen i, tung holong rohangki mida silang di Golgata i.
Hupasolhot
diringku tusi, dompak surgo pardalananki.
b.
Soara sian silang di Golgata : Pauba roham
U : Mangihuthon legenda si Dismas do goar ni
parjahat na paduahon i. Alai mamereng pangalahona di silangna i, tagoari ma
ibana si Maruba, ala muba do rohana di ujung ni ngoluna. Ndang
dialusi Jesus soara pangaleaion ni si Jogal i, hape ianggo si Maruba ndang
tartaonsa umbege pangaleaion ni si Jogal i. Ala ni dipinsang ibana ma donganna
parjahat i. Ingkon songon i do ngolu ni
angka na mananda Jesus, masipodaan, masijamitaan, asa adong hamubaon ni roha.
Mansai koras do pinsangpinsangna i, didok : “Ndang dihabiari ho hape Debata,
atik pe rap hona uhum hita.” Ditanda jala mabiar dope ibana tu Debata atik pe
naung gantung ibana di pamajalan i. Saleleng mabiar sada halak mida Debata,
adong dope disi hamubaon ni roha. Diparhatutu ibana do
uhum na tigor na jinalonasida na dua. Dihatindangkon ibana do ia Jesus ndang
adong diula na so ture. Barani do ibana manindangi nang diparungkilon. Ndang laos didondoni
parungkilon ibana. Ndang dipaganjang ibana marsoal dohot si Jogal i. Alai,
dipasahat ma isi ni rohana tu Jesus na tarsilang i. Ndang moru pos ni rohana tu
Jesus, nang pe naung tarsilang Jesus. Gabe hatuaon do ibana silang ni Jesus i
umbahen didok :
H : “O Jesus ingot ahu, ia
dung sahat Ho tu harajaonMi.”
U : Pangidoan ni si Maruba on patuduhon na tangkas
do diboto ibana tujuan ni hamamate ni Jesus i. Parningotan ni Jesus di ibana do
dipangido, ndang haluaon ni pamatangna. Na ummarga i do dahalaputi. Pandohan
“Ingot ahu” i ma hataridaan ni pangkirimon jala parbue ni hamubaon. Ala adong
di ibana pangkirimon, ditubuhon i do sihol ni roha na mandok: “ Ingot ahu, ia
dung sahat Ho di harajaonMi”. Ndang hau na samban sambing silang ni Jesus di
ibana, alai mual ni hatuaon do, na mangalehon ngolu na manongtong. Silangna
dohot silang ni Jesus i manungguli rohana marhamubaon. Sitaononna i manjou
ibana mananda Jesus. Ngolu no songon i ma dipangido sian halak Kristen. Molo ro
parungkilon, molo ro pangaleleon sian parugamo na asing, molo ro aek magodang,
ingkon rajumanta do i soara sian Debata na manjou hita laho mananda Tuhan i
dohot manjou hita tu hamubaon ni roha. Antong taendehon ma :
Lao ma au tu silangMi.
H : (mangendehon)
BE No. 412 : 3 “Ndi di
dolok adui“
♫ Na mabaor sian i mudar niTuhan i, na tau paiashon au on.
Tung na bernit ditaon Tuhan Jesus disi
Dibaen i, tung holong rohangki mida silang di Golgata i.
Tung na bernit ditaon Tuhan Jesus disi
Dibaen i, tung holong rohangki mida silang di Golgata i.
Hupasolhot diringku
tusi, dompak surgo pardalananki.
c. Soara sian silang ni Jesus : Haholongi donganmu
U : Di tongatonga do dipantikhon silang ni
Jesus i. Dua na mangido tu Ibana, alai sada do dialusi. Nang pe hansit dihilala
Jesus pangontak ni silang i, disangahon
do mandok tu parjahat na paubahon rohana i : “ Situtu do na Huhatingkon tu ho,
sadari on do ho rap dohot Ahu di paradeiso” Marragam tafsiran taringot tu hata
sadari on, andigan i jala boha lelengna. Na tangkas Jesus do mandok i.
Dipatuduhon pandohan i do holong ni rohanan tu jolma. Sai dipaima do hamumulak
ni jolma tu Ibana. Di na rap hita dohot Ibana diparadeiso, disi do hinagok ni
pangkirimon dohot basabasa ni Debata. Paradeiso, hata Persia do i, na
mandok porlak na uli na hinandangan. Molo naeng pasahathon penghargaan Raja
Persia tu sada halak sai mardalandalan do ibana di porlak ni jabuna rap dohot
na manjalo penghargaan i laho patuduhon las ni rohana dohot penghormatanna.
Lumobi sian i dope sangkap ni Tuhan i tu pardosana manolsoli dosanan.
Dibagabagahon do tu angka na manolsoli dosana rap dohot Ibana di inganan na
sonang. I ma holong ni rohaNa di jolma.
H : (mangendehon) BE No. 412 : 4 “Ndi di dolok adui“ (jongjong)
♫ Hona insak do au, raphon silang au lao,
saleleng di portibi on.
Sogot tumpal, hape, siteanon muse
Sogot tumpal, hape, siteanon muse
Ni
na rap dohot Jesus dison.
Dibaen i, tung holong rohangki mida silang di Golgata i.
Hupasolhot
diringku tusi, dompak surgo pardalananki.
12. Panghorhon
ni Hamamate ni Jesus
U : Ndang buni sude na masa i.
Ndang rahasia pambahenan ni Debata di hamamate ni Jesus. Dipangiar do soaraNa,
diribak do hirehire, dihuntal do tano, dirigat do batu mamak, diungkap do angka
tanoman. Saluhutna i hataridaan ni naung marujung
parporanganta i, nunga manong Tuhanta. Patar do i sima lolong ni halak, jala
dung diida induk ni soldadu rap dohot angka paranganna na masa i, gabe
maningangi do nasida didok :
H : Tutu Do On Anak Ni Debata.
U : Pandohan on do kesaksian na parjolo tagan so tubu dope angka
kesaksian ni huria, dung mate jala hehe Jesus. Halak parbegu jala si tiop gogo
i do parjolo ditopot Tuhan i marhite hamamateNa laho mandok sada panindangion
na marisi mutiha na arga, ai punsa ni sude kesaksian, i ma :
H : Tutu Do Jesus Anak Ni Debata.
U : Asa ia taingot pe Ari Hamamate ni Jesus, na, manogu rohanta do i asa
tongtong rade hita gabe sitindangi na mandok :
H : Tutu Do Ibana Anak Ni Debata.
U : Ndang sae holan painondur hita di hamamte ni Jesus i, tama do hita
gabe sitindangi na barani mandok : Sintong do Jesus i mate laho manobus jolma
sian dosa. Antong tahatindangkon ma haporseaonta.
H : Ahu porsea di Debata
Jahowa………………………….. (hundul)
13. Marende Huria BE No.
623 : 1 ……”Tarsilang Ho” (Papungu Pelean Ia, Ib)
♫ Tarsilang Ho, manobus au, tung longang rohangki.
MudarMu na badia i, manesa
dosangki.
♫ Ndang na tarasam balga ni holong ni rohaMi.
Durus mudarMu Tuhanki, ala
ni dosangki.
(musik)
♫ Hulehon ma
Tuhan tu Ho saluhut diringkon,
lao mangoloi Ho, Tuhanki, saleleng
ngolungki.
14. Jamita: Lukas 23 : 33 – 43
15. Marende Huria BES No. 88 : 1 …”Di surgo do alealenta” (P. Pelean)
♫ Jesusku naung manobus ahu, sai naeng haholonganku
Ho.
Tu
dolok Golgata Ho laho nionjar ni
holongMu do.
Hupuji nasa asiMi, alai gumodang holongMi.
♫ Tarsolsolbagi
do rohangku, paidaida dangolMi;
marningot sasude dosangku, ai i do na tinaonMi.
Hupuji nasa asiMi, alai gumodang holongMi.
♫ Jotjotna
i husoadahon Ho, Sipangolu tondingkon.
Mabiar lao manghatindanghon Ho na manghophop au
tongon.
Hupuji nasa asiMi, alai gumodang holongMi.
♫ Bagas uhirhon tu rohangku
panghophopMi humophop au.
Tusi ma togu pingkiranku, guru di Ho sambing ma ahu.
Hupuji nasa asiMi, alai gumodang holongMi.
16. Ulaon na badia
Di tingki marulaon na
badia, mangkuling ma organ hombar tu nomor na di toru on:
1.1. Marende BE No. 152 : 1
1.2. Marende BE No. 153 : 1
1.3. Marende BE No. 154 : 1
1.4.
Marende BE No. 155 : 1
1.5. Marende BE No. 149 : 1
1.6.
Marende BE No. 150 : 1
1.7. Ende
PujipujiaN BE No. 4 : 1 “Sai puji Debata”
♫ Sai puji Debata dibaen asi rohaNa;
huhut tongtong basa di nasa tinompaNa.
Ria ma hita be mamuji Debata,
ai sesa do nuaeng dosanta i dibaen.
Tangiang pangujungi
(Agenda)
17. Tangiang Pelean – Ende Pelean – Tangiang Ale
Amanami – Pasupasu