Humor Rohani : Alani Holit

ALA NI HOLIT

Di sada tingki adong do manang piga halak sarombongan borhat mardalani.
Ia pardalanionnasida i sipata marmotor do sipata markapal laut.
Sahalak sian nasida na sadalanan on, adong do siholit mangging na margoar si Ponot.
Laho masuk tu kapal, dibuat ibana ma karcis di dek.

Hape anggo donganna sude do di Klas. Huroha ndang sonang si holit mangging on di dek i, dihindati ma komporna laho ma ibana manompangnompang tu kamar ni donganna. Sogo ma roha ni donganna on ala manusai tu kamar nasida, ai holan dua do podoman sada kamar. Panggararon ni si Ponot mura, hape modom di Klas.

So pamotoan ni si Ponot, marrunding ma donganna na tolu kamar, laho mambiarbiari si Ponot, songon on :

Hamu ma annon manuktuk, asa husuru si Ponot masuk tu WC, ninna si Bisuk tu angka donganna i.
Jadi didok si Bisuk ma tu si Ponot, molo adong annon manuktuk pintu ingkon laho do ho tu WC, martabuni. Ai diorai do molo tolu sakamar, "olo" ninna si
Ponot.
Dung borngin di na modom si Ponot, ro ma sian kamar na asing tu kamar na tinompang ni si Ponot nangkin. Tarbege ma, sipatu na marlotoklotok.

Tok . . . tok . . . tok ! Siapa? ninna nasida sian bagasan.
Dipabongor ma soarana : Petugas kapal ! ninna.

Disuru ma si Ponot masuk tu kamar WC. Dung manang sadia leleng nasida dipaula manghatai, laho ma donganna i mulak tu kamarna. Jala haruar ma si Ponot sian partabunianna.
Hape ndang sadia leleng ibana muse dung modom, diulakhon dongan na i ma muse manuktuk sian luar masuk ma muse ibana tu WC.
Sipata holan sipatu i ma dibahen marlataklatak sian kamar na asing di lambung ni pintu panompangan ni siholit mangging i, hatop ma didungoi si Ponot laho martabuni muse. Songon i ma manang pigapiga hali sai mulahulak si Ponot masuk tu partabunianna i, sipata nunga sai muap inganan i be ibana.
Susana i ate, sundat modom so sundat bau, holan ala ni holit.