Acara Pesta Paskah Parjolo

PARTORDING NI PARMINGGUON

PESTA PASKAH PARJOLO

(PARNINGOTAN HAHEHEON NI TUHAN JESUS)

DI HURIA KRISTEN BATAK PROTESTAN – HKBP

DISTRIK XVII INDONESIA BAGIAN TIMUR

MINGGU,  20 APRIL 2014

 

Thema :

“Mamaritahon huhut Gabe Sintindangi ni Kristus”

HURIA KRISTEN BATAK PROTESTAN – HKBP

PARTORDING NI PARMINGGUON

PESTA PASKAH PARJOLO

(PARNINGOTAN HAHEHEON NI TUHAN JESUS)

20 April 2014

Thema :         “Mamaritahon huhut Gabe Sintindangi ni Kristus”

1.  Pangaradeon…… hohom     (martangiang di bagasan roha)

2.  Joujou tu Parsaoran dohot Debata

U    :  Huria ni Tuhanta ! Tolhas ma hita nuaeng tu Pesta na bolon, di na marningot hita di ari haheheon ni Tuhan Jesus Kristus sian hamatean. Ala ni i, jumolo ma pinasahat tabe : Selamat ari Paskah ma di hita   saluhutna.

R    :  Selamat Ari Paskah !

U    :  Puji ma Jahowa ale tondingku, jala unang tung halupahon denggan ni basaNa sudeNa. Ndang hasuhatan saluhut pambahenan ni Debata naung mangaroro hita sian linggoman ni hamatean. Ala ni i, olophon ma haheheon ni Tuhan i, ai marhite Haheheon ni Jesus dapot hita haluaon di bagasan asi ni rohaNa na godang i.  Tapuji ma Debata ala pambahenanNa na so hasuhatan i.

R    :  Patimbul ma Jahowa ale Tondingku, ala naung hehe Jesus i.

U    :  Nunga tarbondut hamatean; nunga soluk  hamonangan.

R    :  Jo hamatean, didia hamonanganmi? Jo hamatean, didia soropmi?

U    :  On pe hamu angka donganhu na hinaholongan, marsihohot jala so mubauba ma hamu jala lam sumurung ma tongtong di bagasan Tuhan i. Endehon ma, haleluya, nunga hehe Kristus i.

3.  Marende No. 633: 1-2,4   “Nunga hehe Kristus i”     BL. 633

Nunga hehe Kristus i haleluya  sian hamatean i haleluya

Parlangitan jouhon ma haleluya,  tano on alusi ma, haleluya

Singkop panghophopNa i, haleluya Gok hamonanganNa i, haleluya

Sondang haluaon i, haleluya Patiur dalanta i, haleluya

                                    ----- organ -----   (-----jongjong -----)

Monang do Tuhanta i, haleluya  Talu hamatean i, haleluya

Mago do soropna i, haleluya Ala monang Tuhan i, haleluya

4.  Votum- Introitus :

U    :  Marhitehite Goar ni Debata Ama dohot Goar ni  AnakNa Tuhan Jesus Kristus dohot Goar ni Tondi porbadia na tumompa langit dohot tano on.

R    : Amen

U    :  Unang ho mabiar, Ahu do bonana dohot ujungna. Na mangolu do, jala naung mate do Ahu najolo jala ida ma, Ahu do na mangolu ro di saleleng ni lelengna Jala di Ahu do anakhinsu ni banua toru dohot hamatean.

R    : Haleluya ! Di Tuhan Debatanta i do hatuaon dohot  hasangapon dohot hamuliaon dohot hagogoon.

U    : Na pahehehon Tuhan Jesus, i do na pahehehon dohot hita sogot ala ni Tuhan Jesus. Nunga hehe Tuhan i, nunga tutu hehe Ibana Haleluya

R    :  Mangendehon: Haleluya, haleluya, haleluya.

U    :  Martangiang ma hita:

         Ale Tuhan Jesus, Tuhannami! Na mandok mauliate do hami tu Ho, ala di taluhon Ho do dosa dohot hamatean marhitehite hamamateM i, ala disondangi Ho tanomannami, asa marpangkirimon na mangolu hami ala ni haheheonMi. Ndang pola be mabiar hami mida hamatean, ai Ho do ulunami, ruasMu do hami. Dipaunsat Ho do hami sian haholomon tu hatiuron, sian hamatean tu hangoluan. Antong pargogoi ma hami mamuji dohot mangoloi Ho ariari, pasangaphon Ho di bagasan haporseaon na mangolu, paima sahat hami tu lambungMu. Amen.   

    5.   Marende No. BE.624 : 1 +  5 Haleluya, Haleluya

       Reff :  Haleluya, Haleluya nunga hehe Tuhanta I

                        Haleluya, haleluya puji goarNa i.

           

            1.  Jesus sigomgom tano on. Tuhan ni sandok portibi on.

                 Haleleuya.......

      5.  Pasangap Debatanta I, endehon ma Sipalua i.

Haleluya ……

6.  Patik ni Debata

U    :  Patik ni Debata sihangoluhononta di pestanta sadari on ima na tarsurat di Heber 5 : 8 – 9  :  Ai atik pe Anak i Ibana, diguruhon do pangoloion marhite sian na tinaonanna i!

R    :  Jala dung rimpas gabe sihorhon haluaon salelenglelengna do Ibana di sude na mangoloi Ibana.

U    :  I do sahatna. Antong rap mangido gogo ma hita tu Debata

U+R: Ale Tuhan Debata, sai pargogoi ma hami mangulahon na hombar tu PatikMi. Amen.

7.  Koor :

8.  Marende B.E No. 89 : 1+3  “Ate didia soropmi”          BL.130

Ate di dia soropMi Nuaeng, o hamatean ?

            Di dia hamonanganmi Nuaeng banuatoru ?

            Na talu do hamu sude Na talu do sibolis pe Ai ditaluhon Jesus

                          (----- jongjong ----- )

Mangolu do naung mate i Hurungan dilohahon 

Dirante do musuna i Tabanna diarahon.Tung ise na mangate be

Mangalo ulubalang i Na so tarbaen so monang ?

9.  Joujou panopotion ni dosa – Pangarimangon Pangalaho

U    : Tapaunduk ma rohanta di adopan ni Debata manopoti saluhut angka dosa, hahurangan marhite angka hata, pambahenan dohot pangalahonta na so tama. Tapatedek ma saluhutna di adopanNa na badia i. Unang huphupi dosam, alai solsoli ma saluhutna pambahenanmu na so tama.....

(----- organ angonangon mangendehon BE.No.182:1,  BL.24-----)

U    :  Ale Tuhan Debata, hupatedek hami do diadopanMu sadarion angka pambahenannami na manghasogohon rohaM. Tung jotjot do hutuntun hami mardosa atik pe huboto hami nunga maralo tu lomo ni rohaM. Mansai gogo do hisaphisap ni daging dohot tubutubu ni rohanami mangelaela hami mardosa, gabe marroha mago hami. Ala ni dosa i, gabe sega angka parsaoran na denggan. Disegai dosa i do parsaoran di tonga ni huta, di tonga ni huria, di tonga ni parsaripeon, parhahamaranggion dohot angka parsaoran na asing. Tading do angka ulaon na ringkot binahen ni angka hariburon na mangalalapi hajolmaon, mambahen hami lam dao sian Ho...

Ama :  Hami angka horong Ama, tarjou do hami nian gabe malim di tongatonga ni keluarga dohot masyarakat. Nda ingkon manogunogu jala tiruan ma hami nian di ianakhonnami dohot na humaliang ? Alai jotjotnai husoadahon hami ulaon hamalimon i, gabe lupa hami mangaradoti partondion ni angka sundut na umposo. Ai godang tingkinami na ambolong lalap di parlalapan, manang marondingonding di balik ni rongking ni ulaon siganup ari, gabe sidalian nami i pasiding turgas panogunoguon di ianakhon.

Ina   :  Hami angka horong Ina, tarjou do hami gabe ina pangajari di tongatonga ni keluarga. Alai tung jotjot do huparsidalianhon hami hapogoson, rongking ni ulaon, ulaon adat dohot angka na asing, gabe ndang huhalaputi hami manogunogu ianakhonnami mananda lomo ni rohaM. Di na deba hulehon hami do angka na pinangido ni rohanasida isara ni angka rumang ni hamajuon jaman dohot tekhnologi, alai ndang huparmahan hami nasida, gabe godang nasida disoro tonditondi ni jaman na maotaot i.

Nps   :  Hami angka Naposobulung ni huriaM, jotjot do hulaosi hami poda ni natorasnami. Tuminggil do sipareonnami di rumang ni hamajuon dohot hariburon sian na tumangihon hataM. Madabu do hami tu kenakalan, tarelaela mangihuthon hamajuon ni jaman, mambahen hami lalap di parmeaman, gabe godang tingki na ambolong.

U    :  Ale Tuhan...! Tangihon ma, nunga hupatedek hami angka hahurangannami di joloM, Ama, Ina, Naposobulung pe, mansai jotjot huarsahi hami Ho ala ni pambahenannami na roa i. Ala ni i, asi ma rohaM. Unang jujur angka hahurangannami i. Sai patubu ma roha na manolsoli di hami asa hupauba hami pangalahonami i. Ale Tuhan, nunga disesa Ho dosanami, jala dipadiri Ho di hami hangoluan na manongtong marhite hamamate dohot haheheonMi sian na mate, ala ni i, huradoti hami ma panghophoponMi di hami marhite parange na marhaimbaruon.

         (-----organ angonangon  BE.No. 183 : 1, BL.105----)

U    :  Bagabaga ni Debata taringot tu hasesaan ni dosanta, Munsat pe angka dolok jala humuntal pe angka robean, alai anggo parasi ni rohangku na so tupa munsat sian ho, jala padan ni hadameonku na so tupa humordit, ninna Jahowa Siasii ho. Hasangapon ma di Debata na di ginjang.

R    : Amen.

10. Koor

11. Marende No. 94 : 1 – 2 ALE  TONDINGKU NAUNG HEHE   

Ale tondingku naung hehe Tuhanmu

Nunga ditaban do banuatoru. Las ma roham ai martua ma ho

Rap dohot Jesus mangolu ma ho, Rap dohot Jesus mangolu ma ho

Talu sibolis dibahen Tuhanta.    

Nang hamatean nang dosa sudena.    Sai dihalashon rohanta ma i

PangoluonNa do hita sude PangoluonNa do hita sude

12.Epistel : Psalmen 118 : 1 – 2 + 14 – 24

U :  Mandok mauliate ma hamu tu Jahowa, ai pardengganbasa do Ibana, ai ro di salelenglelengna do asi ni rohana!

R  :  Dohonon ni Israel ma tongon: Ai ro di salelenglelengna do asi ni rohana!

U  :  Jahowa do pargogongku dohot endengku, jadi gabe hatuaonku ibana.

R :  Soara ni olopolop dohot hatuaon marsaringar di undungundung ni angka partigor: Siamun ni Jahowa do sibahen hamonangan.

U :  Timbul situtu do siamun ni Jahowa, siamun ni Jahowa do sibahen hamonangan.

R :  Ndang tagamon mate ahu, sai na mangolu do ahu, asa hupajojor angka pambahen ni Jahowa.

U :  Nunga gogo tutu dipinsang Jahowa ahu, alai nda tung tu hamatean ahu dipasahat.

R :  Ungkap hamu ma di ahu angka bahal ni hatigoran, asa hubongoti angka i laho mamuji Jahowa.

U :  On do bahal ni Jahowa, bongotan ni angka partigor do i sogot.

R :  Mandok mauliate ma ahu di Ho, ala naung dialusi Ho ahu, jala manjadi hatuaonku.

U    :  Batu naung binolongkon ni angka pande bagas, i ma jadi batu parsuhi.

R    :  Sian Jahowa do i masa, halongangan do i anggo di matanta.

U + R   : Ari on do na jinadihon ni Jahowa, * marolopolop jala marlas ni roha ma hita disi.

U    :  Disi ma sahatna, Martua ma na tumangihon Hata ni Debata jala na umpeopsa.  Amen.

13. Koor :

14. Marende No. B.E. No. 93 : 3 PESTA PASKA HATUAON BL. 94

 Tuhan Jesus do na monang,  Tuhan Jesus do pasuang

 Las ni roha  dame pe Las ni roha dame pe

 Dongan golom ma hataNa,  Na porsea di Ibana

 Ndang tarbahen mago be.                                    (Jongjong ma hita)

15. Manghatindanghon Haporseaon

 U    :  Rap dohot donganta sahaporseaon di sandok portibi on, tahatindanghon ma haporseaonta i :

 U+H: Ahu porsea di Debata Jahowa...............  Amen! (---hundul...)

16. Koor

17. Tingting

18. Marende No. 92 : 1...  “Puji Ma Na Manaluhon” (P. Pelean Ia, b)

1.   Puji ma na  manaluhon Dosa hamatean i

      Puji ma na pangoluhon Saluhut pardosa i

      Jesus na dung mate i Las roham o huriaNa 

      Ala na mamillit ho, Jesus i mangolu do

2.   Tole hita mangendehon Halalas ni roha i

      Dohot marolopolophon Sangap ni na monang i

      Na tongtong mangolu i Tole hita mangendehon

      Halalas ni roha i  Di parngolu Jesus i.

3.   I do las ni rohanami Lao mamujimuji Ho

       Ndang be sitoruan hami Ala na dung mate Ho

      Dungkon ni mangolu Ho Nunga ringan tondinami

       Sian hangoluanmi Ala hamonanganmi

4.  Uju i di na manogot  Di na buha siang i

     Mijur do surusuruan Laho tu tanomanMi

     Dung diungkap batu i Dipahundul ma ibana

     Paboahon di na ro   Ndang be dibagasan Ho

5.  Tu tanoman si Maria Paturehon bangkeMi

     Tung beha ma di rohana Dung dibege hataMi ?

     Dohot mangalusi i? Au pe idaonku sogot

     Ho di hasangaponMi Ho, o Jesus, Tuhanki.

6.  Molo hehe pamatangku Molo pinasangap au

     Idaonku Debatangku Jesus Sipangolu au

     Suman tu Ibana au Molo hehe pamatangku

     Jadi ngolungolumi Gabe hangoluanki.

19.Jamita : Ulaon Ni Apostel 10 : 34 - 43

20.Marende No. 91 : 1….Hatuaon do, las ni roha do ”       BL. 55

(Pelean II – Pelean tu Kategori Parompuan HKBP)

1.   Hatuaon do Las ni roha do Hangongot ni Tuhanta i

      Mago do hita Ngot ma Tuhanta Las be, las be ma rohanta i.

      Mago do hita Ngot ma Tuhanta Las be, las be ma rohanta i.

2.   Hatuaon do Las ni roha do Hangongot ni Tuhanta i

      Monang  do Jesus Talu sibolis Las be, las be ma rohanta i.

      Monang  do Jesus Talu sibolis Las be, las be ma rohanta i.

3.    Hatuaon do Las ni roha do Hangongot ni Tuhanta i

       Mungkap do dalan Tu hangoluan Las be, las be ma rohanta i.

       Mungkap do dalan Tu hangoluan Las be, las be ma rohanta i.

4.    Hatuaon do Las ni roha do Hangongot ni Tuhanta i

       I ma gogonta  Dompak dosanta Las be, las be ma rohanta i.

       I ma gogonta  Dompak dosanta Las be, las be ma rohanta i.

5.    Hatuaon do Las ni roha do Hangongot ni Tuhanta i

       Monang ma hita Jumpa ajalta Las be, las be ma rohanta i.

       Monang ma hita Jumpa ajalta Las be, las be ma rohanta i.

21.Parsuruon manghangoluhon Hata ni Debata

U:  Hamonangan! i do nabinoan ni Tuhan Jesus marhite haheheonNa i. Laos hamonanganNa i do na gabe hamonanganta jala i do las ni rohanta di pestanta sadari on.   

R:   Tutu do Tuhan, nunga hehe Ho sian hamatean manghamonanghon hami jala porsea do hami, hami pe na dohot  do muse.  Ajari ma hami mangauhon panghophoponMi di hami asa lam margogo hami mangihuthon Ho di ngolunami

U:    Marhite Tondim na badia i ajari ma hami mangantusi dohot manghangoluhon hata dohot lomo ni rohaM. Parbadiai ma hami di bagasan hasintongan asa tung tarpauba hami rohanami jala tarpature hami ngolu dohot pangalahonami. Padungo ma hami ganup ari mangharinggashon nasa ulaon na denggan paboa na masihol jala malungun hami tu hangoluan na so ra suda na pinaradeM di angka na porsea di haheheonmu, Amen.

R :     (mangendehon BE.635 : 1    “Ro Tuhan Jesus”)

         Ro Tuhan Jesus Anak sasada, parasi roha, parholong I,

         Mate Ibana humophop hita, rumar tanoman I ai hehe Jesus i.

         Ala hehe Jesus ro do ari sogot mangolu au,   Ndang mabiar au

         Huboto do sonang au raphon Jesus,

         Sonang ma au ala naung hehe Jesus i.

22. Tangiang Pelean (Agenda HKBP)  -  Tangiang Panutup

23. Panimpuli dohot Masijalangan

-    Parjamita, Paragenda dohot sude Parhalado jongjong di jolo masijalangan dohot Ruas ni Huria.

-          Song Leader mangendehon BE. No. 720 : 1 ----